ಸೊಳ್ಳೆಗಳ ಜೀವನ ಚಕ್ರ

ಪ್ಲಾಸ್ಮೋಡಿಯಂ ಜೀವನ ಚಕ್ರ

ಪ್ಲಾಸ್ಮೋಡಿಯಂ ಒಂದು ಸೂಕ್ಷ್ಮಾಣು ಹಾಗೂ ಪೂರ್ಣ ಪರಾವಲಂಬಿ ಜೀವಾಣು. ಮಲೇರಿಯ ರೋಗ ಪ್ಲಾಸ್ಮೋಡಿಯಂನಿಂದ ಬರುತ್ತದೆ. ಈ ಪ್ಲಾಸ್ಮೋಡಿಯಂನಲ್ಲಿ ಹಲವಾರು ಜಾತಿಗಳಿದ್ದು, ಅದರಲ್ಲಿ ನಾಲ್ಕು ಜಾತಿಗಳಾದ ವೈವ್ಯಾಕ್ಸ್, ಫ್ಯಾಲ್ಸಿಪ್ಯಾರಂ, ಮಲೇರಿಯೆ ಹಾಗೂ ಓವೇಲ್ ಮನುಷ್ಯರಲ್ಲಿ ಮಲೇರಿಯ ರೋಗ ಉಂಟುಮಾಡುತ್ತವೆ. ವೈವ್ಯಾಕ್ಸ್ ಹಾಗೂ ಫ್ಯಾಲ್ಸಿಪ್ಯಾರಂ ಮಲೇರಿಯ ಸಾಮಾನ್ಯವಾಗಿ ಎಲ್ಲೆಡೆ ಹಬ್ಬಿರುವ ರೋಗ.

ಈ ರೋಗಾಣುಗಳು ಕೆಂಪು ರಕ್ತಕಣಗಳ ಒಳಗೆ ನುಸುಳಿ. ಅದರೊಳಗೆ ಬೆಳೆದು, ಹೆಚ್ಚಿನ ಸಂಖ್ಯೆಯಲ್ಲಿ ಉತ್ಪತ್ತಿಯಾಗಿ ಹೊರಬಂದಾಗ ಮಲೇರಿಯ ರೋಗ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಇದಕ್ಕೆ ಮೊದಲು ಈ ಜೀವಾಣುಗಳು ಪಿತ್ತಜನಕಾಂಗದಲ್ಲಿ ಉತ್ಪತ್ತಿ ಹೊಂದುತ್ತವೆ. ಈ ಸೂಕ್ಷ್ಮಾಣು ಜೀವಿಗಳನ್ನು ಒಬ್ಬರಿಂದ ಮತ್ತೊಬ್ಬರಿಗೆ ಹರಡಲು ಹೆಣ್ಣು ಅನಾಫಿಲೀಸ್ ಸೊಳ್ಳೆಗಳು ಸಹಾಯ ಮಾಡುತ್ತವೆ

ಸೊಳ್ಳೆಗಳ ಜೀವನ ಚಕ್ರ

ಈಗಾಗಲೇ ಹೇಳಿದಂತೆ, ಮಲೇರಿಯ ರೋಗಾಣುಗಳನ್ನು ಹೆಣ್ಣು ಅನಾಫಿಲೀಸ್ ಸೊಳ್ಳೆಗಳು ಒಬ್ಬರಿಂದ ಮತ್ತೊಬ್ಬರಿಗೆ ಹರಡುತ್ತವೆ. ಅನಾಫೆಲೀಸ್ ಹಾಗೂ ಬೇರೆ ಜಾತಿಯ ರೋಗ ವಾಹಕ ಸೊಳ್ಳೆಗಳ ಜೀವನ ಚಕ್ರವನ್ನು ಈ ಕೆಳಗೆ ಚಿತ್ರಿಸಲಾಗಿದೆ. ಮೊದಲಿಗೆ ಹೆಣ್ಣು ಸೊಳ್ಳೆ ಮೊಟ್ಟೆಗಳನ್ನು ನೀರಿನಲ್ಲಿ ಇಟ್ಟು ಅದರಿಂದ ಲಾರ್ವಾಗಳ ಉತ್ಪತ್ತಿ ಆಗುತ್ತವೆ. ಅನಾಫಿಲೀಸ್ ಸೊಳ್ಳೆಗಳು ಸಾಮಾನ್ಯವಾಗಿ ಶುದ್ದವಾದ ನೀರಿನಲ್ಲಿ ಉತ್ಪತ್ತಿಯಾಗುತ್ತವೆ. ಲಾರ್ವಾಗಳು ಬೆಳೆದು ಪ್ಯೂಪಾಗಳಾಗಿ ಪರಿವರ್ತನೆ ಹೊಂದಿ ಕೆಲ ದಿನಗಳಲ್ಲಿ ಸೊಳ್ಳೆಗಳಾಗಿ ಮಾರ್ಪಾಡಾಗುತ್ತವೆ. ಒಂದು ಜೀವನ ಚಕ್ರಕ್ಕೆ ಸುಮಾರು 7 ರಿಂದ 10 ದಿನಗಳು ಹಿಡಿಯುತ್ತದೆ.

ಗಂಡು ಸೊಳ್ಳೆಗಳು ಸಸ್ಯ ಹಾಗೂ ಹೂವಿನ ರಸ ಸೇವೆನೆಯಿಂದ ತನ್ನ ಜೀವನ ಸಾಗಿಸುತ್ತವೆ. ಸೊಳ್ಳೆಗಳ ವಂಶೋತ್ಪತ್ತಿಗೆ ಹೆಣ್ಣು ಸೊಳ್ಳೆಯು ರಕ್ತ ಸೇವಿಸುವುದು ಅತ್ಯಗತ್ಯ. ಸೊಳ್ಳೆ ಮೊಟ್ಟೆಗಳನ್ನು ಇಡುವುದಕ್ಕೆ ರಕ್ತದ ಆಹಾರ ಅತಿ ಮುಖ್ಯ.

ನಮ್ಮ ರಾಜ್ಯದಲ್ಲಿ ಅನಾಫಿಲೀಸ್ ಸೊಳ್ಳೆಗಳು ಸುಮಾರು 26 ಕ್ಕೂ ಹೆಚ್ಚು ಉಪ ಪಂಗಡಕ್ಕೆ ಸೇರಿದ್ದು, 3 ಪಂಗಡಗಳಾದ ಅನಾಫಿಲೀಸ್ ಕ್ಯುಲಿಸಿಫೇಸೀಸ್ (2) ಅನಾಫಿಲೀಸ್ ಫ್ಲೂವಿಯಾಟಲಿಸ್ (3) ಅನಾಫಿಲೀಸ್ ಸ್ಟಿಫೇನ್ಸೈ ಮಲೇರಿಯ ರೋಗವನ್ನು ಹರಡುವುದಕ್ಕೆ ಕಾರಣವಾಗಿವೆ. ಈ ಸೊಳ್ಳೆಗಳ ಬಗ್ಗೆ ಹಲವು ಮುಖ್ಯ ವಿಷಯಗಳನ್ನು  ತಿಳಿದುಕೊಳ್ಳೋಣ.