অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ಹುಲ್ಲು

ಹುಲ್ಲು

ಕಡಿಮೆ ಬೆಲೆಯಲ್ಲಿ ಪ್ಲಾಸ್ಟಿಕ್ ಚಾಪೆಗಳು ಮಾರುಕಟ್ಟೆಯಲ್ಲಿ ದೊರೆಯುತ್ತಿರುವ ಈ ದಿನಗಳಲ್ಲಿ ಹುಲ್ಲಿನ ಚಾಪೆ ಕೊಳ್ಳುವವರು ಬಹು ವಿರಳ. ಹುಲ್ಲಿನಿಂದ ಚಾಪೆ ನೇಯ್ದು  ಅದನ್ನೇ ನಂಬಿ ಬದುಕುವ ಜನಾಂಗವಂತೂ ಇದೀಗ ಹೇಳಹೆಸರಿಲ್ಲದಂತಾಗಿದೆ. ಚಾಪೆ ಹೆಣೆಯಲು ಬಳಕೆಯಾಗುವ ಹುಲ್ಲು ಮಾತ್ರ ನದಿ ದಡಗಳಲ್ಲಿ ಕಾಣಸಿಗುತ್ತಿದೆ.

ಹುಲ್ಲು ನಾಲ್ಕರಿಂದ ಐದು ಅಡಿ ಎತ್ತರಕ್ಕೆ ಬೆಳೆಯುತ್ತಿದ್ದು ನೀರಿರುವ ಕಡೆ ಇದು ಬದುಕುತ್ತದೆ. ಒಂದು ಬುಡದಲ್ಲಿ 50 ರಿಂದ 100 ಹುಲ್ಲು ಕಡ್ಡಿಗಳು ಏಕಕಾಲಕ್ಕೆ ಬೆಳೆಯುವುದು ಇದರ ವಿಶೇಷತೆ. ‘ಬಳುಕುವ ಹುಲ್ಲು’ ಎಂದು ಇದನ್ನು ಕೆಲವು ಕಡೆ ಕರೆಯುವುದು ರೂಢಿ. ಕಾಂಡ ಬರೋಬ್ಬರಿ ಐವತ್ತು ವರ್ಷಗಳವರೆಗೆ ಬದುಕಬಲ್ಲದು. ಹುಲ್ಲು ದನಗಳಿಗೆ ಉತ್ತಮ ಆಹಾರ ಕೂಡ. ನದಿ ಬದಿಯಲ್ಲಿ ಬೆಳೆಯುವುದ ರಿಂದ ಅಲ್ಲಿನ ಮಣ್ಣಿನ ಸವಕಳಿ ತಡೆಗಟ್ಟುವಲ್ಲಿ ತುಂಬಾ ಸಹಕಾರಿ.

ನೀರಿನಲ್ಲೂ ಬೆಳೆಯುವ ಈ ಹುಲ್ಲು ವರ್ಷದುದ್ದಕ್ಕೂ ನೀರಿನಲ್ಲಿ ಇದ್ದರೂ ಯಾವುದೇ ಕಾರಣಕ್ಕೂ ಕೊಳೆಯಲಾರದು. ಪ್ರತಿ ವರ್ಷ ಫೆಬ್ರುವರಿಯಲ್ಲಿ ಹುಲ್ಲು ಕಟಾವಿಗೆ ಸಿದ್ಧಗೊಳ್ಳುತ್ತದೆ. ಒಂದು ಬುಡ 500 ಹುಲ್ಲನ್ನು ನೀಡಬಲ್ಲದು. ಹುಲ್ಲು ಸಣ್ಣದಿರುವಾಗಲೇ ಕಾಣಿಸಿಕೊಳ್ಳುವ ಹೂವು ಹುಲ್ಲು ದೊಡ್ಡದಾದ ನಂತರ ಅರಳುವುದು ಇದರ ವಿಶೇಷತೆ. ಹುಲ್ಲು ಬೆಳೆದಾಗ ಕಡುಹಸಿರು ಬಣ್ಣಕ್ಕೆ ತಿರುಗುತ್ತದೆ. ಹೆಚ್ಚು ಬೆಳೆದರೆ ಹುಲ್ಲು ನೆಲಕ್ಕೆ ವಾಲುತ್ತದೆ. ನಂತರ ಕಟಾವು ಕಷ್ಟ.

ಕಟಾವಾದ ನಂತರ ಹದಿನೆಂಟು ದಿನಗಳ ಕಾಲ ಬಿಸಿಲಲ್ಲಿ ಹುಲ್ಲನ್ನು ಒಣಗಿಸಬೇಕು. ಹುಲ್ಲಿನ ಕಾಂಡ ಮತ್ತು ತುದಿಭಾಗವನ್ನು ಬೇಕಾದ ರೀತಿಯಲ್ಲಿ ಕತ್ತರಿಸಬೇಕು. ಹೂವನ್ನು ದನಗಳಿಗೆ ನೀಡಿದರೆ ಅವು ಹೆಚ್ಚು ಹಾಲನ್ನು ನೀಡುತ್ತವೆಯಂತೆ. ನಂತರ ಹುಲ್ಲನ್ನು ಕೈಮಗ್ಗದಲ್ಲಿ ಹಾಕಿ ಚಾಪೆ ನೇಯುತ್ತಾರೆ. ಹಾಲು, ತುಪ್ಪವನ್ನು ಎತ್ತರದಲ್ಲಿ ನೇತಾಕುವ ‘ಬಲ’ ಎಂಬ ಸಾಧನವನ್ನು ಇದರಿಂದ ತಯಾರಿಸುತ್ತಾರೆ.

ಇದೀಗ ಕಟಾವಿಗೆ ಸಕಾಲವಾಗಿದ್ದು, ಇತ್ತೀಚೆಗೆ ಹುಲ್ಲು ಯಾರಿಗೂ ಬೇಡವಾಗಿ ನದಿ ಬದಿಯಲ್ಲೇ ಹಾಳಾಗುತ್ತಿದೆ. ಪ್ಲಾಸ್ಟಿಕ್ ಚಾಪೆಗೆ ಹೋಲಿಸಿದರೆ ಹುಲ್ಲಿನಿಂದ ತಯಾರಿಸಿದ ಚಾಪೆಯ ಬಾಳಿಕೆ ಹೆಚ್ಚು. ಒಂದು ಚಾಪೆ ಹತ್ತು ವರ್ಷಗಳ ಕಾಲ ಬಾಳಿಕೆ ಬರುತ್ತಿದ್ದು, ತಯಾರಿಗೆ ಎರಡು ದಿನಗಳು ಬೇಕು. ಹಳ್ಳಿಗಳಲ್ಲಿ ಇಂದಿಗೂ ಕೈಮಗ್ಗದ ಚಾಪೆಗೆ ಬಹುಬೇಡಿಕೆಯಿದ್ದು ತಯಾರಿಸುವವರು ಕಾಣಸಿಗುವುದೇ ಕಷ್ಟವಾಗಿದೆ. ಸರಿಯಾಗಿ ಬೆಳೆದಿರದ ಹುಲ್ಲಿನಿಂದ ಚಾಪೆ ತಯಾರಿಸಿದರೆ ಹೆಚ್ಚು ಕಾಲ ಬಾಳಿಕೆ ಬರುವುದಿಲ್ಲ.

ಮೂಲ :ದೂರ ಶಿಕ್ಷಣ ಘಟಕ,ವಿಸ್ತರಣಾ ನಿರ್ದೇಶನಾಲಯ, ಹೆಬ್ಬಾಳ,ಕೃಷಿ ವಿಶ್ವವಿದ್ಯಾನಿಲಯ, ಜಿ.ಕೆ.ವಿ.ಕೆ. ಬೆಂಗಳೂರು.

ಕೊನೆಯ ಮಾರ್ಪಾಟು : 1/28/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate