ನೋ ಸ್ಕಾಲ್ಪೆಲ್ ವ್ಯಾಸೆಕ್ಟಮಿ

ಪುರುಷರ ಸಂತಾನಹರಣ ಚಿಕಿತ್ಸೆಯಲ್ಲಿ ಸುಲಭ ಹಾಗೂ ಸರಳ ವಿಧಾನ

ವೃಷಣದಲ್ಲಿ ಉತ್ಪತ್ತಿಯಾಗುವ ವೀರ್ಯಾಣುಗಳು ಸಂಭೋಗ ಕ್ರಿಯೆಯಲ್ಲಿ ಮಹಿಳೆಯ ಗರ್ಭಾಶಯವನ್ನು ತಲುಪದಂತೆ ಮಾಡುವುದು ನೋ ಸ್ಕಾಲ್ ಪೆಲ್ ವ್ಯಾಸೆಕ್ಟಮಿ. ಈ ಚಿಕಿತ್ಸೆಯಲ್ಲಿ ವೃಷಣದಿಂದ ವೀರ್ಯಾಣು ಸಾಗಿಸುವ ನಾಳವನ್ನು ಕತ್ತರಿಸಿ ಅದರ ಎರಡೂ ಕೊನೆಯ ಭಾಗಗಳನ್ನು ಗಂಟು ಹಾಕುವುದು. ಇದರಿಂದ ವೀರ್ಯಾಣುಗಳು ವೃಷಣದಿಂದ ಹೊರಬರಲು ಸಾಧ್ಯವಾಗುವುದಿಲ್ಲ. ಈ ಚಿಕಿತ್ಸೆ ಪಡೆದ ಪುರುಷನೊಂದಿಗೆ ಲೈಂಗಿಕ ಕ್ರಿಯೆ ಮೊದಲಿನಂತೆಯೇ ಸಾಮಾನ್ಯವಾಗಿ ನಡೆದರೂ ಗರ್ಭಧಾರಣೆಯಾಗುವುದಿಲ್ಲ. ಇದರಿಂದಾಗಿ ಗರ್ಭಧಾರಣೆಯ ಭಯವಿಲ್ಲದೇ ಲೈಂಗಿಕ ಕ್ರಿಯೆಯಲ್ಲಿ ತೊಡಗಬಹುದು.

ಎನ್.ಎಸ್.ವಿ ಯಾ ವಿಭಿನ್ನತೆಗಳು

• ಗಾಯ, ಹೊಲಿಗೆ ಇಲ್ಲದ ಚಿಕಿತ್ಸೆ
• ೫ ರಿಂದ ೧೦ ನಿಮಿಷಗಳಲ್ಲಿ ಚಿಕಿತ್ಸೆ
• ಚಿಕಿತ್ಸೆ ನಡೆದ ಅರ್ಧಗಂಟೆಯಲ್ಲಿ ಮನೆಗೆ ಹೋಗಬಹುದು
• ಎನ್ ಎಸ್ ವಿ ಚಿಕಿತ್ಸೆಯಿಂದ ಲೈಂಗಿಕ ಹಾಗೂ ದೈಹಿಕ ಶಕ್ತಿಗೆ ಕುನ್ದುಂಟಾಗುವುದಿಲ್ಲ.

ಎನ್ ಎಸ್ ವಿ ಯಾರಿಗೆ?

• ಮಕ್ಕಳು ಬೇಡವೆಂದು ನಿರ್ಧರಿಸಿದ ಪುರುಷರಿಗೆ
• ಸಂತಾನ ನಿರೋಧಕ್ಕೆ ಶಾಶ್ವತ ವಿಧಾನವನ್ನು ಬಯಸುವವರಿಗೆ

ಎನ್ ಎಸ್ ವಿ ಚಿಕಿತ್ಸೆಯ ನಂತರ ಅಡ್ಡ ಪರಿಣಾಮಗಳು ಇವೆಯೇ?

• ಎನ್ ಎಸ್ ವಿ ಯಿಂದ ಕೆಲವು ಅಡ್ಡಪರಿಣಾಮಗಳು ಇವೆ. ಆದರೆ ಅವು ತಾತ್ಕಾಲಿಕವಾದವು.
• ವೃಷಣದ ಊಟ / ವೃಷಣದಲ್ಲಿ ಮೃದುತ್ವ ಉಂಟಾಗಬಹುದು
• ವೃಷಣದಲ್ಲಿ ಸ್ವಲ್ಪ ನೋವು ಉಂಟಾಗಬಹುದು

ಎನ್ ಎಸ್ ವಿ ನಂತರ ಪುರುಷನ ದೈಹಿಕ ಶಕ್ತಿ ಕುಂದುತ್ತದೆಯೇ?

• ಎನ್ ಎಸ್ ವಿ ಚಿಕಿತ್ಸೆಯಿಂದಾಗಿ ಪುರುಷನಲ್ಲಿ ದೈಹಿಕ ನಿಶ್ಯಕ್ತಿ ಉಂಟಾಗುವುದಿಲ್ಲ.
• ಚಿಕಿತ್ಸೆಯ ನಂತರವೂ ಮೊದಲಿನಂತೆಯೇ ಎಲ್ಲ ಕೆಲಸಗಳನ್ನು ಮಾಡಬಹುದು.

ಚಿಕಿತ್ಸೆ ನಂತರ ಯಾವಾಗ ಕೆಲಸ ಕಾರ್ಯಗಳನ್ನು ಮಾಡಬಹುದು?

• ಇದು ಚಿಕಿತ್ಸೆ ಪಡೆದ ವ್ಯಕ್ತಿಯು ಮಾಡುವ ಕೆಲಸವನ್ನು ಅವಲಂಬಿಸಿರುತ್ತದೆ.
• ಸುಲಭದ ಕೆಲಸವಾಗಿದ್ದರೆ ಚಿಕಿತ್ಸೆಯ ೪೮ ಗಂಟೆಗಳ ನಂತರ ಕೆಲಸ ಆರಂಭಿಸಬಹುದು.
• ಸೈಕಲ್ ತುಳಿಯುವುದು ಹಾಗೂ ಇಂತಹುದೇ ಕೆಲಸಗಳನ್ನು ಕನಿಷ್ಠ ೭ ದಿನಗಳ ನಂತರ ಮಾಡಬಹುದು.

ಪುರುಷನ ಲೈಂಗಿಕ ಶಕ್ತಿಯ ಮೇಲೆ ಪರಿಣಾಮಗಳಾಗುತ್ತವೆಯೆ?

• ಎನ್ ಎಸ್ ವಿ ಚಿಕಿತ್ಸೆಯಿಂದ ಪುರುಷರ ಲೈಂಗಿಕ ಶಕ್ತಿ ಹಾಗೂ ಚಟುವಟಿಕೆಗಳಲ್ಲಿ ಯಾವುದೇ ಬದಲಾವಣೆಗಳು ಆಗುವುದಿಲ್ಲ.
• ಶಿಶ್ನದ ಗಾತ್ರ ಹಾಗೂ ನಿಮಿರುವಿಕೆಯಲ್ಲಿ ಬದಲಾವಣೆಯಾಗುವುದಿಲ್ಲ.
• ಎನ್ ಎಸ್ ವಿ ಯಿಂದ ಲೈಂಗಿಕ ಆಸಕ್ತಿ ಕಡಿಮೆಯಾಗುವುದಿಲ್ಲ.
• ಗರ್ಭಧಾರಣೆಯ ಭಯವಿಲ್ಲದೇ ಲೈಂಗಿಕ ಕ್ರಿಯೆಯಲ್ಲಿ ತೊಡಗಬಹುದು.

ಎನ್ ಎಸ್ ವಿ ಚಿಕಿತ್ಸೆ ನಡೆಸಿದ ತಕ್ಷಣದಿಂದಲೇ ಪುರುಷರಲ್ಲಿ ಸಂತಾನಹರಣ ಶಕ್ತಿ ಉಂಟಾಗುತ್ತದೆಯೇ

• ಎನ್ ಎಸ್ ವಿ ಚಿಕಿತ್ಸೆ ನಂತರವೂ ಕೆಲವು ವೀರ್ಯಾಣುಗಳು ವೀರ್ಯ ನಾಳಗಳಲ್ಲಿ ಸಕ್ರಿಯವಾಗಿರುತ್ತವೆ. ಈ  ವೀರ್ಯಾಣುಗಳು ಸುಮಾರು ಮೂರು ತಿಂಗಳಿನವರೆಗೆ ವೀರ್ಯ ನಾಳಗಳಲ್ಲಿ ಉಳಿದಿರುತ್ತವೆ.
• ಈ ಅವಧಿಯಲ್ಲಿ  ದಂಪತಿ ಇತರ ಸಂತಾನ ನಿರೋಧಕಗಳನ್ನು ಉಪಯೋಗಿಸಬೇಕು.
• ಎನ್ ಎಸ್ ವಿ ಚಿಕಿತ್ಸೆ ಪಡೆದವರು ಚಿಕಿತ್ಸೆಯು ಯಶಸ್ವಿಯಾಗಿರುವುದನ್ನು ಖಚಿತಪಡಿಸಿಕೊಳ್ಳಲು ಮೂರು ತಿಂಗಳ ನಂತರ ವೀರ್ಯ ವಿಶ್ಲೇಷಣಾ ಪರೀಕ್ಷೆ ಮಾಡಿಸಿಕೊಳ್ಳಬೇಕು.

ಎನ್ ಎಸ್ ವಿ ಚಿಕಿತ್ಸೆಯಿಂದ ಲೈಂಗಿಕ ರೋಗಗಳನ್ನು ತಡೆಯಲು ಸಾಧ್ಯವೇ

• ಎನ್ ಎಸ್ ವಿ ಗರ್ಭಧಾರಣೆ ತಡೆಯುವ ವಿಧಾನ ಮಾತ್ರ. ಇದರಿಂದ ಲೈಂಗಿಕ ರೋಗಗಳನ್ನು ತಡೆಯಲು ಸಾಧ್ಯವಿಲ್ಲ.
• ಲೈಂಗಿಕ ರೋಗಗಳಿಂದ ರಕ್ಷಣೆ ಪಡೆಯಲು ತಪ್ಪದೇ ನಿರೋಧ್ ಬಳಸಬೇಕು.

ಎನ್ ಎಸ್ ವಿ ಚಿಕಿತ್ಸೆ ಶಾಶ್ವತವೇ

• ಹೌದು ಎನ್ ಎಸ್ ವಿ ಶಾಶ್ವತ ವಿಧಾನ. ಬದಲಾಯಿಸಲು ಸಾಧ್ಯ

ಎನ್ ಎಸ್ ವಿ ಚಿಕಿತ್ಸೆಗಾಗಿ ಸಂಪರ್ಕಿಸಿ.

ಎನ್ ಎಸ್ ವಿ ಚಿಕಿತ್ಸೆ ಪ್ರಾಥಮಿಕ ಆರೋಗ್ಯ ಕೇಂದ್ರ, ಸಮುದಾಯ ಆರೋಗ್ಯ ಕೇಂದ್ರ, ತಾಲೋಕ್ ಆಸ್ಪತ್ರೆ ಅಥವಾ ಜಿಲ್ಲಾ ಆಸ್ಪತ್ರೆಗಳಲ್ಲಿ ಲಭ್ಯ.

ಫಲಾನುಭವಿಯ ಮಾತು

ನಾನು ಜೆ.ಎನ್. ನರಸಿಂಹಸ್ವಾಮಿ, ತುಮಕೂರು ಜಿಲ್ಲೆ, ಕೊರಟಗೆರೆ ತಾಲೋಕ್, ಜಮೆನಹಲ್ಲಿಯವನು. ನನಗೀಗ ೪೪ ವರ್ಷ. ನನ್ನ ಕೆಲಸ ರೈಸ್ ಮಿಲ್ನಲ್ಲಿ ಮೂಟೆ ಹೊರೋದು. ಈಗ ೮ ತಿಂಗಳ ಹಿಂದೆ ನನ್ನ ಹೆಂಡತಿ ಲಕ್ಷ್ಮಿಗೆ ಎರಡನೇ ಮಗುವಿನ ಹೆರಿಗೆಯಾಯ್ತು. ಅದು ಸಿಸೇರಿಯನ್ ಹೆರಿಗೆ. ಮೊದಲನೇ ಮಗೂ ಕೂಡ ಸಿಸೇರಿಯನ್ನಲ್ಲೇ ಆಗಿತ್ತು. ಎರಡು ಮಕ್ಕಳು ಸಾಕು ಅಂತ ನಾವಿಬ್ರೂ ತೀರ್ಮಾನ ಮಾಡಿದ್ವಿ. ಸರಿ, ನಮ್ಮ ಹಳ್ಳಿ ಕಡೆ ಇರೋದೆಲ್ಲಾ  ಏನು ಮಕ್ಕಳಾಗದಂತೆ ಹೆಂಡತಿಗೆ ಆಪರೇಶನ್ ಮಾಡಿಸೋದು. ನನ್ನ ಹೆಂಡತಿಗೆ ಎರಡು ಸಾರಿ ಸಿಸೇರಿಯನ್ ಆಗಿದ್ರಿಂದ ಮತ್ತೆ ಅವಳಿಗೆ ಆಪರೇಶನ್ ಮಾಡಿಸೋದು ನನಗೆ ಇಷ್ಟ ಇರಲಿಲ್ಲ. ಅದೂ ಅಲ್ಲದೆ ಡಾಕ್ಟ್ರು ಅವಳ ರಕ್ತದ ಗುಂಪು ಎಬಿ  ನೆಗೆಟಿವ್ ಅಂತ ಹೇಳಿದ್ರು. ಆ ರಕ್ತ ಸಿಗೋದು ತುಂಬಾ ಕಷ್ಟವಂತೆ. ಇಂಥ ಸಂದರ್ಭದಲ್ಲಿ ವಸಂತಲಕ್ಷ್ಮಿ ಅನ್ನೋ 'ಅಶಾ' ನನಗೆ ಎನ್ ಎಸ್ ವಿ ಮಾಡಿಸ್ಕೊಳ್ಳೋಕೆ ಹೇಳಿದ್ರು. ಅಯ್ಯೋ ನಾನು ಕೆಲಸ ಮಾಡೋ ಗಂಡಸು, ನಾನು ಆಪರೇಶನ್ ಮಾಡಿಸ್ಕೊಂದ್ರೆ ದುಡಿಯೋರು ಯಾರು ಮೇಡಂ ಅಂತ ಅವರಿಗೆ ಕೇಳಿದೆ. ಅಯ್ಯೋ ದಡ್ಡ ನೀನಿನ್ನೂ ಯಾವ ಕಾಲದಲ್ಲಿದ್ದಿ. ಗಂಡಸರಿಗೆ ಮಕ್ಕಳಾಗದಂತೆ ಆಪರೇಶನ್ ಮಾಡಿದ್ರೆ ಕೆಲಸ ಮಾಡಕ್ಕಾಗೋದಿಲ್ಲ ಅಂತ ಹೇಳಿದೋರು ಯಾರು? ಇದನ್ನು ಮಾಡಿಸ್ಕೊಂಡ್ರೆ ನಿನಗೆ ಯಾವುದೇ ತೊಂದರೆ ಇಲ್ಲ, ಜೊತೆಗೆ ನಿನ್ನ ಹೆಂಡತಿಗೆ ಮೂರನೇ ಸಾರಿ ಆಪರೇಶನ್ ಮಾಡಿಸೋದನ್ನು ತಪ್ಪಿಸಬಹುದು, ಅಂತ ಹೇಳಿ ನನ್ನನ್ನ ಒಪ್ಪಿಸಿಯೇಬಿಟ್ರು.

ಹತ್ತ್ತು ನಿಮಿಷ ಅಷ್ಟೇ ಸಾರ್, ನನಗೆ ಗೊತ್ತೇ ಆಗಲಿಲ್ಲ. ಆಗೇ ಹೋಯ್ತು. ಕುಯ್ಲೂ ಇಲ್ಲ, ಇನ್ನು ಹೊಲಿಗೆ ಹಾಕೋದು ಎಲ್ಲಿಂದ ಬಂತು? ಡಾಕ್ಟ್ರು ಎಲ್ಲಾನೂ ಹೂವೆತ್ತಿದ ಹಂಗೆ ಮಾಡಿದ್ರು. ಅರ್ಧ ಗಂಟೆ ಇರಬಹುದು ಅಷ್ಟೇ ಮನೆಗೆ ಹೋದೆ. ಎರಡು ಮೂರು ದಿನ ಬಿಟ್ಟು ಮತ್ತೆ ನನ್ನ ಮಾಮೂಲಿ ಕೆಲಸ ಮಾಡಲಿಕ್ಕೆ ಹೊರಟೆ. ನನಗೇನೂ ಇದರಿಂದ ವ್ಯತ್ಯಾಸ ಗೊತ್ತಾಗಿಲ್ಲ. ಗಂಡಸರು ಆಪರೇಶನ್ ಮಾಡಿಸ್ಕೊಂದ್ರೆ ಸುಸ್ತಾಯ್ತದೆ ಕೆಲಸ ಮಾಡಕ್ಕಾಗದಿಲ್ಲ ಅಂತಾ ನಾನು ಏನ್ ತಿಳಕ್ಕಂಡಿದ್ನೋ ಅದೆಲ್ಲಾ ಸುಳ್ಳು ಅಂತ ಗೊತ್ತಾಯ್ತು. ಈಗ ನೋಡಿ ಐದು ತಿಂಗಳಾಯ್ತು, ಎಲ್ಲ ಕೆಲಸಾನೂ ಮೊದಲಿನಂಗೆ ಮಾಡ್ತಾ ಇದ್ದೀನಿ. ಹೆಂಡತಿ ಜೊತೆ ದೇಹ ಸಂಪರ್ಕ ಕೂಡ ಮೊದಲಿನಂಗೆ ಇದೆ. ಈಗ ನಮಗಿಬ್ರುಗೂ ಮತ್ತೆ ಮಕ್ಕಳಾಗುವ ಭಯ ಇಲ್ಲ ನೋಡಿ, ಅದರಿಂದಲೂ ಏನೋ ಈಗ ಮೊದಲಿಗಿಂತಾ ಚೆನ್ನಾಗಿ ಸೇರ್ತಾ ಇದ್ದಿವಿ.

ನಾನು ಹೇಳೋದು ಇಷ್ಟೇ ಸಾರ್, ಗಂಡಸರು ಮಕ್ಕಲಾಗದಂಗೆ ಆಪರೇಶನ್ ಮಾಡಿಸ್ಕೊಳ್ಳೊದ್ರಿನ್ದ ಅವರಿಗೆ ಯಾವುದೇ ತೊಂದ್ರೆ ಇಲ್ಲ. ಇದನ್ನೇ ನಾನು ನಂಗೆ ಗೊತ್ತಿರೋವ್ರ ಹತ್ರಾನೂ ಹೇಳ್ತಾ ಇದ್ದೀನಿ. ನನ್ನನ್ನ ನೋಡಿ ಸುಮಾರು ಜನ ಮಾಡಿಸ್ಕೊಂಡವ್ರೆ. ನಾವು ಹೆಂಡತಿ, ಮಕ್ಕಳು ನೆಮ್ಮದಿಯಾಗಿದ್ದೀವಿ.

ಮೂಲ:ಕುಟುಂಬ ವಾರ್ತೆ.